Samkvæmt traustum heimildum Litlu Frjálsu, er það mat fagmanna að maríjúana sem ræktað sé á Íslandi sé eitt það besta sem hægt er að fá. Gæði þess og hreinleiki sé langt umfram það sem áður hefur verið flutt inn, selt og dreift á Íslandi.
Sömu heimildir herma að vinsældir þessa íslenska maríjúana séu þannig að menn séu jafnvel farnir að hugsa til ræktunar sérstaklega til útflutnings.
Maríjúana hefur verið flokkað sem eiturlyf og þ.a.l. ólöglegt á Íslandi.
Síðustu ár hefur mikil umræða farið fram á Íslandi og víðar, um hvort lögleiða ætti maríúana - ýmist til einkaneyslu og eða til lækninga.
Nú eru 29 ríki í Bandaríkjunum sem leyfa maríjúana á forsendum lækninga. 9 ríki leyfa maríjúana til einkaneyslu og 13 önnur hafa “afglæpavætt” efnið án þess að leyfa það almennt.
Umræðan um maríjúana er þessa dagana fyrirferðarmikil á sjónvarpsstöðinni CNN, í sérstakri þáttaröð, undir stjórn Dr. Sanjay Gupta, þar sem áhrif maríjúana og s.k ópíóða eru bornir saman. Ópíóðar eru verkjalyf sem teljast ávanabindandi og flokkast undir s.k. “læknadóp”!
150 manns deyja í Bandaríkjunum á hverjum degi vegna ópíóða, fleiri en allir sem farast í bílslysum, brjóstakrabbameini og skotsárum á hverjum degi.
Ekki er langt síðan að fréttir um ópíóða var í umræðu hér á landi þar sem almennt er litið á þessi lyf sem hættuleg og í raun ekkert annað en lögleg eiturlyf.
En aftur að íslensku maríjúana. Er ekki tækifæri í þessu fyrir Suðurnesin? Á Suðurnesjum er tómt og hálfklárað álver sem enginn vill nota. Frábært fyrir risastórt gróðurhús. Þar er nóg rafmagn, fullt af hreinu vatni, útflutningshöfn í Helguvík og stutt á flugvöllinn ef varan er send með flugi!
Að vísu þarf aðeins að bæta gæsluna, en það ætti að vera lítið mál með góðum girðingum og nokkrum myndavélum.
Stóra málið er hvort íbúar Keflavíkur myndu sætta sig frekar við ilminn af maríjúana en pestinni sem kom með United Silicon?
Hér er um að ræða einstakt tækifæri á nýrri útflutningsvöru fyrir Ísland sem virðist vera góð og jöfn eftirspurn eftir.
Heimildir Litlu Frjálsu herma að nú séu nokkrir öflugir Keflvíkingar að láta skoða lagalegu hliðina á málinu og ef allt gengur eftir er nokkuð ljóst að fjárhagsvandamál Reykjanesbyggðar - sem hafa verið mikil og íþyngjandi - hverfa upp í reyk á nokkrum árum.
Það skyldi þó ekki vera að íslenskt maríjúana sé lausn allra vandamála Suðurnesjanna?